NDËRRIMI I FILTRAVE

Filtri i karburantit te dizeli

Te motorët modernë dizel, pompa e presionit të lartë dhe diznat punojnë me toleranca shumë të vogla dhe lubrifikohen nga vetë nafta. Filtri i karburantit është i vetmi mbrojtës mes naftës dhe atyre pjesëve.

Kur filtri lihet shumë gjatë, dy gjëra ndodhin. E para: rrjedha bie dhe motori humb fuqinë nën ngarkesë. E dyta, dhe më e shtrenjta: grimcat kalojnë dhe e konsumojnë pompën. Kur pompa fillon të lëshojë metal, ai metal shpërndahet nëpër tërë sistemin — dhe atëherë nuk ndërrohet vetëm pompa, por edhe diznat dhe gypat.

Filtri kushton pak. Sistemi i plotë i karburantit kushton shumë. Ky është krahasimi që duhet mbajtur në mend kur mendohet se filtri mund të presë edhe pak.

Në Kosovë ka edhe një arsye shtesë: cilësia e naftës nuk është kudo e njëjtë, dhe uji ose papastërtitë në naftë e ngarkojnë filtrin më shpejt se sa parashikon plani i prodhuesit.

Filtri i ajrit

Filtri i ajrit i bllokuar do të thotë më pak ajër në motor. Pasojat: harxhim më i lartë, tym i zi, humbje fuqie, dhe te dizeli më shumë blozë — që do të thotë DPF që mbushet më shpejt.

Nuk duhet pastruar me presion ajri dhe përdorur prapë. Presioni i lartë i dëmton fibrat dhe filtri e humb aftësinë filtruese, edhe pse duket i pastër.

Filtri i kabinës

I vetmi filtër që nuk e mbron motorin por ju. Kur ndotet, dëgjohet nga fryrja e dobët e ajrit, xhamat që mjegullohen ngadalë, dhe erë e mbyllur në kabinë.

Ndotja e tij nuk shkakton defekt mekanik, por një filtër i lagësht dhe i ndotur bëhet vend i mirë për myk — dhe kjo ndihet sa herë ndizet ventilimi.

Filtri i vajit

Ndërrohet gjithmonë bashkë me vajin. Vaji i ri nëpër një filtër të vjetër nuk ka kuptim: filtri i mbushur e hap valvulën e anashkalimit dhe vaji fillon të qarkullojë i pafiltruar.

Cilësia këtu ka rëndësi më shumë se ç’duket. Filtrat shumë të lirë kanë material më të dobët dhe valvulë kthimi që nuk mban — rezultati është vonesë në presionin e vajit gjatë ndezjes, pikërisht momenti kur motori është më i cenueshëm.